"ᐱᐅᔪᒥᒃ ᓯᕗᒻᒧᐊᒡᓗᑎᓪᓗ," ᑎᓕᐅᕆᕗᖅ ᐱᐅᕈᓪ ᓕᔅᒪᓐ, ᐃᓚᒋᔭᐅᔪᖅ ᑎ ᒋᐅᓪ ᒎᑦ'î First Nation−ᑯᓐᓄᑦ ᐃᓅᓚᐅᖅᓯᒪᔪᒧᑦ ᐱᕈᖅᓴᓪᓗᓂᓗ Fort providence−ᒥ. ᐊᕐᕌᒍᑦ ᖁᓕᑦ ᐊᓂᒍᖅᓯᒪᓕᖅᑐᑦ, ᐊᐅᓚᑦᑎᔨᐅᓯᒪᓕᖅᑐᖅ ᕗᐊᑦ ᒥᐅᑦᔅ ᑲᑎᒪᔨᖏᓐᓄᑦ. ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᑎᓪᓗᒋᑦ, ᖃᐅᔨᒪᙱᖦᖢᓂ ᖃᓄᐃᓕᐅᕈᒪᖕᒪᖔᑦ ᑎᑎᕋᖅᑎᐅᓂᕐᒧᑦ ᐃᓕᓐᓂᐊᖅᖢᓂ, ᐃᓱᒪᓪᓗᓂ ᐊᔪᕐᓇᙱᑦᑐᑯᓘᓇᔭᕐᓂᖓᓂᒃ ᑎᑎᕋᖅᑎᐅᓂᕐᒥᒃ ᓇᓂᓯᔭᕆᐊᒃᓴᖅ. ᑭᖑᓂᐊᒍᑦ, ᐱᓕᒻᒪᒃᓴᓚᐅᖅᑐᖅ ᐃᓕᓐᓂᐊᕆᐅᖅᓴᓕᓵᖅᑐᓂᑦ, ᐃᓱᒪᓪᓗᓂ ᐱᒋᐊᑐᐃᓐᓇᕆᐊᖃᕋᓱᒋᓪᓗᓂ ᐊᖏᕐᕋᒥᓂᒃ ᓄᓇᓕᖓᓂ. ᑕᐃᒪᓕ, ᐃᖅᑲᓇᐃᔭᓕᓚᐅᖅᑐᖅ ᑮᓇᐅᔭᓕᕆᔨᒃᑯᓐᓂᒃ ᑲᑎᒪᔨᓂᒃ ᐊᒻᒪᓗ ᐱᓕᕆᖃᑎᖃᖃᑦᑕᖅᑐᓂ ᓄᓇᓕᓐᓂ ᒥᑭᔪᓂᒃ ᐱᓕᕆᕕᐅᔪᓂᒃ. 

"ᐃᓄᓕᒫᑦ ᐃᖅᑲᓇᐃᔭᓕᖅᑎᑦᑎᑐᐃᓐᓇᖅᐸᙱᓚᑦ ᑐᙵᕕᖃᑐᐃᓐᓇᖅᖢᑎᒃ ᐱᓕᕆᖃᑦᑕᖅᓯᒪᓂᑰᓂᕐᒥᒃ, ᑕᐃᒪᐃᓐᓂᖓᓄᓪᓗ ᐃᓕᓐᓂᐊᖅᓯᒪᔭᕆᐊᖃᖅᐳᑎᑦ."

ᐱᓕᕆᓕᒪᔪᒻᒪᕆᐅᓪᓗᓂ ᑭᓯᐊᓂ ᐃᓕᓐᓂᐊᖅᓯᒪᙱᖦᖢᓂ, ᐃᓕᓐᓂᐊᕆᐊᒃᑲᓐᓂᕈᒪᓕᓚᐅᖅᑐᖅ 40−ᓂᒃ ᐅᑭᐅᖃᓕᖅᖢᓂ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᖅᖢᓂ Aurora ᓯᓚᑦᑐᖅᓴᕐᕕᖕᒥ ᕗᐊᑦ ᓯᒥᑦ−ᒥ. ᑕᐃᑲᙵᑦ, ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐊᐅᓚᑦᑎᔨᐅᓂᕐᒧᑦ ᓯᓚᑦᑐᖅᓴᕐᕕᒡᔪᐊᒥᑦ ᐋᑕᐹᔅᑲᒥᑦ. ᐃᖅᑲᓇᐃᔭᖃᑦᑕᓚᐅᖅᑐᖅ ᐊᓯᖏᓐᓂ ᓄᓇᓕᓐᓂ ᐊᖏᕐᕋᕈᓐᓇᖅᓯᒻᒪᑦ ᐊᒻᒪᓗ ᐃᖅᑲᓇᐃᔭᒃᑲᓐᓂᓕᖅᑐᓂ ᑮᓇᐅᔭᓕᕆᔨᒃᑯᓐᓂ ᐊᓪᓚᖓᔪᑦ ᑲᑎᒪᔨᖏᓐᓄᑦ. ᓯᕗᓕᖅᑎᓄᑦ ᑐᑭᒧᐊᖅᑎᑦᑎᔨ ᐊᐅᓪᓚᖅᑎᓪᓗᒍ, ᖁᕝᕙᕆᐊᖅᑎᑕᐅᓚᐅᖅᐳᖅ ᒫᓐᓇᓗ ᑲᒪᒋᔭᖃᓕᖅᖢᓂ ᑕᒪᐃᓐᓂᑦᑎᐊᖅ ᐊᐅᓚᑦᑎᕝᕕᒋᔭᐅᔪᓂᒃ, ᑮᓇᐅᔭᓕᕆᓂᕐᒧᑦ ᖃᓄᐃᙱᑦᑎᐊᕈᓐᓇᕐᓂᕐᒧᓪᓗ ᐱᓕᕆᐊᒃᓴᕆᔭᐅᔪᓂᒃ. ᕿᒥᕐᕈᔪᑦ ᐃᖅᑲᓇᐃᔭᖅᑎᑖᕐᓂᕐᒥᒃ ᐱᕋᔭᑦᑕᐅᓯᒪᔪᓄᑦ ᐱᔨᑦᓯᕋᐅᑎᓂᒃ ᐊᒻᒪᓗ ᐃᖅᑲᓇᐃᔭᖅᑎᑑᔾᔮᒐᓂ. 

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᓄᓇᒥᓂᒃ ᐊᐅᓪᓚᖁᔨᓪᓗᑎᒃ ᐃᓕᓐᓂᐊᒃᑲᓐᓂᕈᒪᓪᓗᑎᒃ. "ᐃᓕᓐᓂᐊᕐᓂᓕᕆᔨᒃᑯᑦ.. ᐊᕐᕌᒎᒍᓐᓇᖅᑐᑦ ᒪᕐᕉᓐᓄᑦ, ᓯᑕᒪᓄᑦ ᐅᕝᕙᓗ ᑐᖔᓃᓪᓗᓂ. ᑕᒪᓐᓇ ᐃᓅᓯᖅᐱᑦ ᐃᓚᖓ ᒥᑭᑦᑐᑯᓘᒻᒪᑦ. ᐃᓕᓐᓂᐊᕐᓗᑎᑦ ᒪᒃᑯᒃᑎᓪᓗᑎᑦ," ᑎᓕᐅᕆᔪᖅ. ᐱᔭᕇᖅᑎᓪᓗᒋᑦ ᐃᓕᓐᓂᐊᖅᑕᒥᓂᒃ, ᓕᔅᒪᓐ ᐃᓱᒪᔪᖅ ᐃᓅᓱᒃᑐᑦ ᑭᖑᒧᑦ ᑕᑯᒋᐊᕆᐊᖃᖅᑐᒋᓪᓗᒋᑦ ᐊᒻᒪᓗ ᐃᑉᐱᓐᓂᐊᓂᖃᑦᑐᑎᒃ ᐱᐊᓂᒃᓯᓂᕐᒥᒃ ᐊᒻᒪᓗ ᐃᓕᕋᓇᕈᓐᓇᖅᑐᓂ ᐃᓕᓐᓂᐊᕆᐊᕐᓗᓂ ᐊᖏᔪᑦᑎᐅᓂᖅᓴᐅᓪᓗᓂ ᓄᑲᖅᑎᐅᓂᕐᓴᐅᓪᓗᓂ ᐃᓕᓐᓂᐊᖃᑎᒥᓂᒃ. 

ᐃᓕᓐᓂᐊᕆᐊᕋᒥ, ᐃᓄᑑᓗᐊᒧᑦ ᐊᒃᓱᕈᓚᐅᖅᑐᖅ ᐊᒻᒪᓗ ᐃᓕᑦᑐᓂ ᐊᐅᓪᓚᕆᐊᖃᑐᐃᓐᓇᖅᑐᓂ ᐊᒻᒪᓗ ᐱᖃᓐᓇᕆᔭᖅᑖᖅᑐᓂ. ᐅᓪᓗᒥ ᒪᒃᑯᒃᑐᑦ ᐃᓕᓐᓂᐊᕆᐊᖅᑐᑦ ᐊᐃᓯᒪᓪᓗᑎᒃ ᐱᖃᓐᓇᕆᔭᒥᓂᒃ ᐃᓚᒥᓂᒡᓗ ᑐᓴᐅᒪᖃᑎᖃᐃᓐᓇᕈᓐᓇᖅᐳᑦ ᑕᕐᕆᔭᐅᑎᒃᑯᑦ ᐅᖃᓪᓚᖃᑦᑕᐅᑎᓂᒃᑯᑦ ᐊᒻᒪ ᐃᓕᓐᓂᐊᖅᑎᓪᓗᒍ, ᖃᑕᙳᑎᒥᓄᑦ ᐅᖃᓪᓚᖃᑎᖃᖃᑦᑕᓚᐅᖅᐳᖅ ᖃᐅᑕᒫᑦ ᑐᓴᐅᒪᖃᑎᒌᖏᓐᓇᕋᓱᒃᖢᓂ ᐊᒻᒪ ᐃᑲᔪᖅᑐᖅᑕᐅᕙᒃᖢᓂ. ᐃᓕᑦᑎᕝᕕᒋᓚᐅᖅᑕᖓ ᐃᓕᓐᓂᐊᕐᕕᖕᒥ ᐱᒻᒪᕆᐅᓂᖓᓂᒃ ᑲᑎᙵᖃᑎᖃᐃᓐᓇᕐᓂᖅ ᐃᓕᓐᓂᐊᖃᑎᖏᓐᓂᒃ ᓲᖃᐃᒻᒪ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᐱᙳᕐᒪᑕ.

ᐃᑲᔪᖅᑕᐅᓗᐊᓚᐅᙱᒻᒪᑦ ᒫᓐᓇ ᐊᑐᐃᓐᓇᐅᓕᖅᑐᒥᒃ ᐃᓕᓐᓂᐊᕐᕕᓂ ᐊᒻᒪᓗ ᐃᓕᒋᐊᖃᓚᐅᖅᑐᖅ ᖃᓄᖅ ᑮᓇᐅᔭᓂᒃ ᐊᑐᖅᑐᒃᓴᓂᒃ ᐊᒻᒪᓗ ᑕᖅᑭᒧᑦ ᑮᓇᐅᔭᑎᒍᑦ. ᓕᔅᒪᓐ ᐱᔪᓐᓇᑦᑎᐊᓚᐅᖅᑐᖅ ᓄᓇᕗᑦ ᓯᓚᑖᓂᙶᖅᑐᒥᒃ ᐃᒡᓗᖓᓃᙶᖅᑐᒥᒃ ᐃᓕᓐᓂᐊᖅᑎᓪᓗᒍ ᐃᑲᔪᖃᑦᑕᐅᑎᔪᓐᓇᓚᐅᖅᖢᑎᒡᓗ ᐊᒻᒪ ᓴᓇᔭᕆᐅᖅᓴᔪᑦ ᐸᐃᕆᕝᕕᖏᓐᓂᒃ. ᐃᓕᓐᓂᐊᕐᕕᖕᒥ ᐃᓅᓯᓕᕆᔨᓄᑦ ᐃᑲᔪᖅᑕᐅᔪᒪᖃᑦᑕᖁᔨᕗᖅ ᐅᕝᕙᓘᓐᓃᑦ ᐊᔪᕆᖅᓲᔾᔨᕙᒡᓗᓂ ᐊᖅᑯᑎᒃᓴᒥᒃ ᓂᕈᐊᕐᓂᐊᕈᕕᑦ ᖃᔅᓯᒃᑲᓐᓂᕐᓂᒃ ᐱᓕᕆᐊᖑᖔᕈᓐᓇᖅᑐᓂᒃ ᒫᓐᓇ ᐊᑐᐃᓐᓇᐅᔪᖃᓕᖅᖢᓂ. ᖃᐅᔨᒪᓚᐅᙱᑦᑐᖅ ᐊᓯᔾᔩᔪᓐᓇᕐᓂᕐᒥᓂᒃ ᐱᓕᕆᐊᒃᓴᓂᒃ ᐱᒻᒪᕆᐅᓪᓗᓂᓗ ᐱᔪᒪᓂᕆᔭᐅᔪᑦ ᐊᓯᔾᔨᖅᑎᓪᓗᒋᑦ.

ᐊᐅᓚᓐᓂᐊᕐᓗᒍ ᖃᓄᐃᙱᑦᑎᐊᕐᓂᖓ ᐃᓱᒪᖓᓗ ᖃᓄᐃᙱᑦᑎᐊᕐᓂᖓ, ᓕᔅᒪᓐ ᐃᖏᕐᕋᓯᒪᔪᖅ ᐊᕐᕌᒍᓄᑦ 32−ᓄᑦ, ᐃᑲᔪᖅᓱᖅᑕᐅᓪᓗᓂ ᐊᓯᖏᓐᓄᑦ ᓱᓐᓂᐅᒪᔪᓄᑦ ᐃᓄᖕᓄᑦ ᓄᓇᓕᖕᒥ ᐃᓕᑦᑎᓪᓗᓂᓗ ᐅᓂᒃᑳᖏᓐᓂ. ᐱᓱᑲᑕᒃᖢᓂ, ᐃᖃᐃᓕᓴᕐᖢᓂ ᐱᖃᑎᖃᕐᖢᓂᓗ ᐱᐅᔪᓂᒃ ᐃᓄᖕᓂᒃ. ᑕᐃᒪᓕ ᐊᖕᒪᓗᖅᓯᓯᒪᔪᑦ ᑕᐃᑲᓃᖃᑦᑕᖅᓯᒪᒐᓗᐊᖅᖢᑎᒃ, ᑕᐃᑲᓃᑦᑐᒪᔪᖅ ᐊᓯᒥᓄᑦ ᓄᓇᓕᒥᓄᓪᓗ. ᐊᔾᔨᓕᐅᕆᖃᑦᑕᖅᓯᒪᔪᖅ ᐊᒻᒪᓗ ᐃᑲᔪᖅᐸᒃᖢᓂᒋᑦ ᑕᑯᔭᐅᖅᑰᔨᓪᓗᑎᒃ, ᐊᒻᒪᓗ ᓇᖕᒥᓂᖅ ᐊᔾᔨᙳᐊᒥᓂᒃ ᑕᑯᑎᖦᖢᓂᒋᑦ ᐊᐅᓪᓚᑲᑕᕈᓘᔭᖃᑦᑕᖅᑎᓪᓗᒍ ᐊᓯᖏᑦ ᐊᐅᓪᓚᕈᓐᓇᙱᑦᑐᑦ ᓄᓇᕐᔪᐊᕐᒧᑦ ᑕᑯᔪᓐᓇᕐᓂᐊᕐᒪᑕ. 

ᒪᑐᕙᓪᓕᐊᓕᕐᓗᒍ, ᓕᔅᒪᓐ ᐅᖃᓚᐅᖅᑐᖅ, "ᒪᒃᑯᒃᑐᑦ ᐃᓕᓐᓂᐊᕆᐊᖁᑐᐃᓐᓇᖅᑕᒃᑲ. ᐱᕕᒃᓴᓕᒻᒪᕆᐊᓘᒻᒪᑕ ᑕᖅᑳᓂ. ᖃᓄᐃᓕᐅᕈᓐᓇᖅᑐᒻᒪᕆᐅᕗᑎᑦ ᓄᓇᓕᔅᓯᓐᓄᑦ ᐅᑎᕈᕕᑦ ᓄᓇᓕᕋᓛᓄᑦ ᐅᕝᕙᓘᓐᓃᑦ ᓄᓇᓕᐸᐅᔭᕐᓄᑦ. ᐃᓅᓯᖅ ᐊᑐᑐᐃᓐᓇᕐᓗᒍ."

ᐱᐅᕈ ᓕᔅᒪᓐ ᑎᓕᐅᕆᕗᖅ ᒪᒃᑯᒃᑐᓂᑦ ᐱᐅᔫᖁᓪᓗᒋᑦ ᓯᕗᒧᐊᖁᓪᓗᓂᒋᓪᓗ ᓲᖃᐃᒻᒪ ᑕᐃᒪᐃᓕᐅᖏᓐᓇᐅᔭᖕᒪᑦ. ᐃᓕᓐᓂᐊᓯᒋᐊᖅᑎᓪᓗᒍ ᑭᖑᕙᖅᖢᓂ, ᐱᓱᑲᑕᒃᖢᓂ, ᐊᔾᔨᓕᐅᕆᑲᑕᒃᖢᓂ ᑲᔾᔮᕐᓇᕐᓂᖓᓂᒃ ᐃᓄᖕᓄᑦ ᓄᓇᕐᔪᐊᕐᒥ, ᖃᐅᔨᓯᒪᓕᖅᑐᖅ ᖃᓄᖅ ᓯᕗᓂᒃᓴᑦᑎᐊᕙᖕᒧᑦ ᐃᖏᕐᕋᔪᓐᓇᕐᒪᖔᑦ ᐊᒻᒪ ᖃᐅᔨᑦᑎᐊᕐᓇᖅᖢᓂ ᖁᔭᓕᔭᕆᐊᖃᖅᑕᒥᓂᒃ ᓄᓇᒥᓂᒃ. ᐆᒃᑑᑎᖃᕋᓱᒃᓗᓂ ᒪᒃᑯᒃᑐᓄᑦ ᐃᓅᓯᒃᑯᑦ ᐊᓯᒥᓂᒡᓗ ᓇᒃᓴᖅᖢᓂ ᐊᐅᓪᓚᑲᑕᒃᑎᓪᓗᒍ ᐊᔾᔨᙳᐊᒃᑯᑦ, ᓯᕗᒻᒧᐊᒃᐸᓪᓕᐊᔪᖅ ᐱᐅᓛᒃᑯᑦ ᖃᐅᔨᒪᔭᒥᓂᒃ ᖃᓄᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.