ᐊᕕᖦᖢᓂᒋᑦ ᐱᕕᖃᕐᓂᖓ ᐊᓪᓚᓄᑦ ᓄᓇᖃᕐᕕᐅᔪᒧᑦ ᓴᐃᓐᑦ ᓗᐊᕋᓐᑦ, ᒫᓂᑑᐸ ᐊᒻᒪ ᐅᐃᓂᐹᒡ, ᑭᓯᐊᓂ ᑕᐅᑐᓪᓗᐊᑕᖅᑐᖅ ᑲᔪᓯᑦᑎᐊᕐᓂᕐᒥᒃ ᐱᓯᓂᓯᒧᑦ. ᓴᐃ−ᐋᓐ ᓯᑳᑦ−ᔫᓕᑰ ᐱᕈᖅᓴᓚᐅᖅᓯᒪᕗᖅ ᐊᓪᓚᖓᔪᓂ ᓄᓇᓕᖕᓂ ᐱᙳᐊᖃᑦᑕᓕᖅᖢᓂᓗ ᐊᒋᐊᒐᕐᒥᒃ ᐅᑭᐅᖃᓕᖅᖢᓂ ᑕᓪᓕᒪᓂᒃ. ᖁᕕᐊᓇᖅᑐᖅ ᐱᕈᖅᓴᔭᐅᓯᒪᓂᕐᒥᓂᒃ ᖃᐅᔨᒪᓪᓗᓂ ᓇᑭᙶᕐᓂᖓᓂᒃ ᐃᓕᖅᑯᓯᖏᓐᓂᒡᓗ ᐃᓚᐅᔪᓐᓇᖅᖢᓂᓗ. ᐃᓕᑦᑎᓚᐅᖅᑐᖅ ᒪᒃᑯᒃᖢᓂ ᖃᓄᖅ ᑎᓯᖃᕆᐊᒃᓴᖅ, ᓄᓇᒥ ᐱᓕᕆᓂᕐᒥᒃ, ᐃᖃᓗᖕᓂᒃ ᐊᒻᒪᓗ ᐸᐅᕐᖓᕐᓂᒃ ᑲᑎᖅᓱᐃᓂᕐᒥᒃ. ᐅᓄᕐᓂᖅᓴᑦ ᐃᓄᐃᑦ ᓄᓇᓕᖏᓐᓂ ᐊᒃᑐᐊᓂᖃᖅᑐᑦ ᐃᒃᐱᒋᓪᓗᓂᓗ ᓴᙱᔪᒥᒃ ᐊᒃᑐᐊᓂᖃᕐᓂᕐᒥᒃ ᓄᓇᒧᑦ ᐃᓄᖕᓄᓪᓗ. 

ᐅᐃᓂᐹᒡ ᓯᑲᑦ-ᔫᓕᑰ ᐃᓕᓐᓂᐊᕆᐊᖅᐸᓚᐅᖅᑐᖅ, ᐅᐊᓐᓇᖓᓂ ᓄᓇᓕᐸᐅᔭᐅᑉ. ᓄᓇᖃᖅᑳᖅᓯᒪᓗᐊᙱᖦᖢᓂ, ᔅᑳᑦ−ᔫᓕᑰᕐ ᑎᔅᓯᓈᕿᓚᐅᖅᐳᖅ ᑕᐅᑐᒃᑎᒥᓂᒃ ᓄᓇᖃᖅᑳᖅᓯᒪᔪᑦ ᐱᖃᓐᓇᕆᔭᖏᓐᓂᒃ ᐊᒻᒪ ᓄᓇᖃᖅᑳᖅᓯᒪᙱᑦᑐᓂᒃ ᐃᓄᖕᓂᒃ ᐃᓱᒪᓚᐅᖅᐳᖅ ᐃᖅᑭᓕᕆᔭᐅᓇᓱᒋᓪᓗᓂ ᐊᒻᒪ ᐃᓱᒪᕈᓘᔭᖅᖢᓂ ᐃᓅᓯᖓ ᖃᓄᐃᑦᑑᖕᒪᖔᑦ. ᐃᓕᓐᓂᐊᕐᕕᒃ ᖁᕕᐊᒋᑦᑎᐊᓚᐅᖅᑕᖓ ᑭᓯᐊᓂ ᐃᓄᖕᓂᒃ ᑲᑎᖃᑎᖃᕐᓂᖅ ᐊᒃᓱᕈᕐᓇᖅᑐᖅᓯᐅᕈᑎᖃᓚᐅᖅᑐᖅ. 

ᐱᓱᒃᖢᓂ ᒪᕐᕉᖕᓄᑦ ᓄᓇᕐᔪᐊᓄᑦ ᐊᒃᓱᕈᕐᓇᖅᑐᒃᑰᕐᖢᓂᓗ, ᖁᔭᓕᓪᓗᓂ ᓇᓂᓯᔭᕆᐊᒃᓴᖅ ᐃᓄᖕᓂᒃ ᐊᖏᕈᓐᓇᖅᑐᓂᒃ ᑭᓇᐅᓂᕐᒥᓂᒃ. "ᑕᐃᒪᓕ ᐃᓱᒪᓕᐅᕋᒪ, 'ᕼᐄ, ᑖᒃᑯᓄᖓ ᐊᓯᖏᓐᓄᑦ ᕿᑐᑦᑐᒐᐅᔭᕐᓄᑦ ᓈᒻᒪᒋᔾᔮᙱᑕᕋ, ᑖᒃᑯᐊ ᐊᓯᖏᑦ, ᐊᓯᖏᑦ ᐃᓄᐃᑦ ᐃᓱᒪᒋᔭᖏᑦ ᖃᓄᐃᓕᐅᕆᐊᖃᕋᓱᒋᓪᓗᒋᑦ, ᑭᓱᓕᒫᑦ ᐱᐅᓂᖅᓴᒻᒪᕆᐅᓚᐅᖅᑐᑦ," ᔅᑳᑦ−ᔫᓕᑯ ᐃᖅᑲᐅᒪᔪᖅ. 

ᐃᓕᓴᕐᓇᐅᑎᖓ ᐊᓪᓚᖓᓪᓗᓂ ᐊᑦᑐᐃᓂᖃᖅᓯᒪᔪᖅ ᐱᓕᕆᐊᖏᓐᓂᑦ ᐊᒻᒪ ᐱᓕᕆᐊᖏᓐᓂᑦ ᐅᓪᓗᒥ ᐊᒻᒪ ᓴᖅᑭᖃᑦᑕᖅᑕᖏᑦ ᓯᓚᕐᔪᐊᒥᑦ. ᑭᖑᓪᓕᖅᐹᖏᓐᓂ ᐃᖅᑲᓇᐃᔮᒃᓵᒃ ᐊᒃᑐᐊᓂᖃᕐᖢᓂ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓄᑦ. ᔅᑳᑦ−ᔫᓕᑰᕐ ᐱᓕᕆᐊᖃᕋᓱᓲᖅ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᑕᒪᒃᑭᕐᖢᓂ, ᐅᐸᒍᑎᖃᑦᑕᕐᓂᖅ ᐱᙳᐊᖅᑐᓄᑦ ᖃᓄᐃᓕᐅᕈᑎᓄᓪᓗ. ᐱᓇᓱᐊᖅᑎᓪᓗᒍ ᐃᓕᓐᓂᐊᕐᓂᕐᒥᑦ ᓇᒻᒥᓂᖃᕐᓂᕐᒥᑦ ᐃᖅᑲᓇᐃᔭᕐᓂᕐᒥᓪᓗ ᓇᒻᒥᓂᖃᕐᓂᕐᒧᑦ ᑲᑐᔾᔨᖃᑎᒌᓂᑦ, ᐱᔪᒪᔪᖅ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᑕᑯᓐᓇᒐᕆᔭᐅᓗᓂ ᓇᒻᒥᓂᖃᕐᓂᕐᒧᑦ ᓄᓇᓕᓐᓂᑦ. ᑕᑯᕙᓪᓕᐊᑐᐃᓐᓇᖅᐳᖅ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᓇᖕᒥᓂᖃᖅᑎᐅᔪᓂᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᓇᖕᒥᓂᖃᖅᑐᓂᒃ, ᑭᓯᐊᓂ ᐱᓕᕆᐊᒃᓴᕐᔪᐊᓂᒃ ᐱᑕᖃᓗᐊᙱᑦᑐᖅ ᐊᖏᔫᑎᓂᒃ ᑲᒻᐸᓂᐅᔪᓂᒃ. ᑕᒪᓐᓇ ᐊᓯᔾᔨᕈᒪᓂᐊᖅᑕᖓ ᐊᒻᒪᓗ ᐊᓯᔾᔩᔪᒪᓪᓗᓂ ᐱᓕᕆᕕᐅᔪᓂᒃ.  

"ᑕᐃᒃᑯᓄᖓ ᒪᒃᑯᒃᑐᓄᑦ ᓄᓇᖃᖅᑳᖅᓯᒪᔪᓄᑦ ᓂᕕᐊᖅᓵᓄᑦ ᐅᑭᐅᖃᖅᑐᓄᑦ 14-ᓂᒃ 15-ᓂᒡᓘᓐᓃᑦ, ᖃᐅᔨᓇᓱᒃᑎᓪᓗᒋᑦ ᖃᓄᐃᓕᐅᕈᒪᖕᒪᖔᑕ, ᖃᐅᔨᒪᖁᕙᒃᑲ ᓂᕈᐊᒐᒃᓴᖏᑦ ᑭᒡᓕᖃᖅᑎᑕᐅᙱᓐᓂᖏᓐᓂᒃ ᐊᒻᒪ ᑕᐃᒪᐃᑦᑐᒦᓕᕈᓐᓇᕐᓂᖏᓐᓂᒃ."

ᐃᓕᓐᓂᐊᖅᑎ ᐋᔅᑐᐊ ᐃᓕᓐᓂᐊᕐᕕᖕᒥ ᓇᖕᒥᓂᖃᕐᓂᕐᒧᑦ ᐅᐃᓂᐹᒡᒥ, ᔅᑳᑦ−ᔫᓕᔅᑐ ᓄᓇᖃᖅᑳᖅᓯᒪᔪᑦ ᓇᖕᒥᓂᖃᕐᓂᕐᒧᑦ ᐃᓕᓐᓂᐊᕐᓂᕐᒧᑦ ᐱᓕᕆᖃᑎᒌᓄᑦ ᐱᓕᕆᐊᒃᓴᒦᑉᐳᖅ. ᑖᓐᓇ ᐱᓕᕆᐊᖑᔪᖅ ᑲᑎᑎᑦᑎᕗᖅ ᓄᓇᖃᖅᑳᖅᑐᑦ ᐅᒃᐱᕆᔭᖏᓐᓂᒃ, ᐊᑐᖅᐸᒃᑕᖏᓐᓂᒃ ᐃᓕᖅᑯᓯᑐᖃᖏᓐᓂᒡᓗ ᐱᓕᕆᐊᖑᕙᒃᑐᓂᒃ ᓇᖕᒥᓂᕆᔭᐅᔪᓂ ᓄᓇᓕᖕᓂ. ᑐᓴᐅᒪᖃᑎᒌᒃᑎᑦᑎᑲᑕᒃᐳᑦ ᐃᓕᓐᓂᐊᖅᑎᑦ ᑲᑎᑦᑐᓐᓇᖅᖢᑎᒃ ᐃᖅᑲᓇᐃᔭᖅᑎᒃᓴᖅᓯᐅᖅᑎᓂᒃ ᐊᖏᔫᑎᓂᒃ ᑯᐊᐳᕇᓴᓂᒃ, ᒪᑐᐃᖅᓯᓗᑎᒃ ᓯᕗᓂᒃᓴᑦᑎᓐᓂ ᐊᒻᒪ ᑐᓴᖅᑎᑦᑎᒃᑲᓐᓂᖅᐸᒡᓗᑎᒃ ᓯᕗᓂᒃᓴᒥ ᐃᖅᑲᓇᐃᔮᒃᓴᓄᑦ ᐃᓱᒪᓕᐅᕆᖃᑦᑕᓛᖁᓪᓗᒋᑦ. ᐱᓕᕆᐊᒃᓴᐅᔫᑉ ᐊᔪᙱᓐᓂᖃᖅᑐᑦ ᓄᓇᖃᖅᑳᖅᓯᒪᔪᑦ ᐃᖅᑲᓇᐃᔭᖅᑎᖏᑦ ᑲᑎᖃᑎᖃᖅᑐᑦ ᐃᓕᓐᓂᐊᖅᑎᓂᒃ ᓄᓇᓕᖕᒥᐅᓪᓗ ᖁᕕᐊᒋᓪᓗᓂᐅᒃ ᐃᓚᒋᔭᐅᓂᕐᒥᒃ.

ᐃᓕᓐᓂᐊᕐᕕᐊᓗᒻᒥ ᓯᕗᓪᓕᖅᐹᒥ ᓇᒻᒥᓂᖃᕐᓂᕐᒧᑦ ᐃᓕᓐᓂᐊᓚᐅᖅᑐᖅ ᐊᒻᒪᓗ ᖁᕕᐊᒋᔭᖃᒻᒪᕆᓚᐅᖅᑐᖅ ᐃᓕᑕᒥᓂᒃ ᓂᐅᕐᕈᑎᖃᕋᓱᐊᕐᓂᕐᒥᒃ ᐊᒻᒪᓗ ᓴᖅᑮᓂᕐᒥᒃ ᓇᒻᒥᓂᖃᑦᑎᐅᔪᓂᒃ. ᔅᑳᑦ−ᔫᓕᑯᕐ ᐊᒻᒪ ᓄᓇᖃᖅᑳᖅᓯᒪᔪᑦ ᐱᖃᓐᓇᕆᔭᖏᑦ ᓴᖅᑭᑦᑎᕙᓪᓕᐊᓕᓚᐅᖅᐳᑦ ᐊᒡᒐᒃᑯᑦ ᐊᒻᒪ ᐱᓕᕆᖃᑦᑕᖅᓯᒪᓂᖓ ᐃᓱᒪᓕᓚᐅᖅᖢᓂ ᓇᖕᒥᓂᖃᕐᓂᕐᒥᒃ, ᖃᐅᔨᒪᓪᓗᓂ ᐃᓚᖏᓐᓂᒃ ᐊᔪᙱᓐᓂᖃᕐᓂᖓᓂᒃ ᑲᒻᐸᓂᑖᕆᐊᒃᓴᖅ. ᖃᐅᔨᓚᐅᖅᑐᖅ ᑕᑯᓚᐅᖅᓯᒪᖏᓐᓂᕐᒥᓂᒃ ᐱᓕᕆᓂᑯᒥᓂᒃ ᐊᒻᒪᓗ ᐃᓱᒪᓪᓗᓂ ᖃᓄᐃᒻᒪᑦ ᑕᐃᒪᐃᒻᒪᖔᖅ. 

"ᑕᑯᓚᐅᖅᓯᒪᙱᒃᑯᒪ ᖃᓄᐃᓕᐅᖃᑦᑕᖅᓯᒪᔭᓐᓂᒃ, ᑕᐃᒪᐃᓕᐅᕆᐊᖃᕋᔭᖅᐳᖓ. ᐱᓪᓗᒍ ᐊᓯᖃᕆᐊᖃᕐᒥᒻᒪᑦ ᑕᖅᑳᓂ ᐃᓱᒪᔪᒥᒃ ᐊᑦᔨᓴᐃᓐᓇᖏᓐᓂᒃ ᐃᓱᒪᒋᔭᓐᓂᒃ ᑭᓯᐊᓂ ᑕᐃᒪᐃᔾᔮᖏᑦᑐᖅ. ᑕᐃᒪᐃᓚᐅᖅᑕ. ᐊᑏ," ᓯᑳᑦ−ᔫᓕᑰ ᐃᒻᒥᓂᒃ ᐃᓱᒪᓚᐅᖅᑐᖅ. 

ᐅᓪᓗᐃᓐᓇᒃᑯᑦ, ᒪᑭᖃᑦᑕᖅᑐᖅ ᕿᑎᕋᓕᖅᑎᓪᓗᒍ, ᐅᓐᓄᓴᒃᑯᑦ ᐅᓐᓄᒃᑯᓪᓗ ᐃᓕᓐᓂᐊᖅᑐᓂ ᐊᒻᒪᓗ ᐃᖅᑲᓇᐃᔭᓕᕆᓪᓗᓂ. 

ᐃᖅᑲᓇᐃᔭᖅᑐᖅ ᓄᓇᖃᖅᑳᖅᓯᒪᔪᑦ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᓐᓂ ᖃᓄᐃᓕᐅᕈᑎᓄᑦ ᑐᑭᒧᐊᒃᑎᑦᑎᔨᐅᓪᓗᓂ. ᐸᕐᓇᐃᓂᖅ ᖃᓄᐃᓕᐅᕈᑎᓂᒃ, ᓂᕈᐊᕐᓗᓂ ᐃᓂᒃᓴᓂᑦ, ᐋᖅᑭᒃᓱᐃᓂᖅ ᓂᕿᓂᑦ, ᐊᐅᓚᑦᑎᓂᖅ ᑭᐱᙳᐃᔭᖅᑎᑦᑎᓂᕐᓂ, ᐋᖅᑭᒃᓯᓂᕐᓗ ᑮᓇᐅᔭᖃᖅᑎᑦᑎᔪᓂᒃ ᓂᐅᕕᐊᒃᓴᖃᖅᑎᓄᓪᓗ ᑲᑎᖅᓱᖅᓯᒪᔪᓂᑦ, ᓯᑳᑎ−ᔫᓕᔅ ᐊᑐᖃᑦᑕᖅᑐᖅ ᐃᓅᓯᕐᒧᑦ. ᐃᖅᑲᓇᐃᔮᖓᑕ ᑐᕌᒐᕆᓪᓗᐊᑕᖅᑕᖓ ᐃᖅᑲᓇᐃᔮᖃᕐᓂᕐᒧᑦ ᓂᐅᕐᕈᑎᖃᕋᓱᐊᕐᓂᕐᒥᑦ VP-ᒥᑦ ᓱᓕᔪᓄᑦ ᐱᓐᖑᐊᕐᓂᕐᒧᑦ ᐊᒻᒪᓗ ᑭᐱᙳᐃᔭᕐᓂᕐᒧᑦ. ᑕᐃᑯᖓ ᑎᑭᓚᐅᖏᓐᓂᕐᒥᓂ, ᐱᔭᕇᕆᐊᖃᖅᑐᖅ ᐃᓕᓐᓂᐊᕐᕕᔾᔪᐊᒥ ᐃᓕᓐᓂᐊᖅᑕᒥᓂᒃ. 

ᐅᖃᐅᔾᔨᒋᐊᕐᓂᖓ ᐃᓕᓐᓂᐊᕐᕕᕐᔪᐊᕐᒥᑦ ᐃᓕᓐᓂᐊᖅᑎᒥᑦ ᐃᓱᒪᔪᖅ ᓇᒻᒥᓂᖃᕐᓂᕐᒥᑦ ᖃᐅᔨᓴᕐᓗᓂ ᓇᓖᕌᕋᔅᓴᖏᓐᓂᑦ. ᐱᖁᔨᔪᖅ ᐱᓕᕆᐊᒃᓴᒥᑦ ᑭᓯᐊᓂ ᕿᒥᕐᕈᖁᔨᔪᖅ ᐊᓯᖏᓐᓂᒃ ᐱᓕᕆᕝᕕᖕᓂᑦ. ᔅᑳᑦ-ᔫᓕᑰᕐ ᐃᓱᒪᓗᐊᓚᐅᙱᑦᑐᖅ ᓴᓇᔪᓕᕆᓂᕐᒥᒃ−ᑐᙵᕕᓕᖕᒥᒃ ᐱᓕᕆᕝᕕᖕᓂᒃ ᐃᓚᖓᓗ ᐱᔪᒪᔭᖓᑕ ᐃᓚᖓ. "ᐃᓱᒪᒍᕕᑦ ᓇᖕᒥᓂᖃᕐᓂᕐᒥᒃ, ᑎᓕᐅᑦᑎᐊᖅᐸᕋ. ᑕᒪᓐᓇ ᐱᓕᕆᐊᖑᑦᑎᐊᖅᑰᖅᐳᖅ ᖃᐅᔨᑐᐊᕈᔅᓯ. ᑲᑉᐱᐊᓱᙱᓪᓗᑎᑦ ᑕᑯᒋᐊᕆᐊᒃᓴᖅ ᐊᓯᖏᓐᓂᒃ ᐱᓕᕆᕝᕕᖕᓂᒃ ᐊᐱᕆᕙᒡᓗᑎᓪᓗ ᐊᐱᖅᓱᑲᑕᒍᒪᔪᓂᒃ ᐃᖅᑲᓇᐃᔭᖅᑎᒋᔭᒥᓄᑦ, ᐱᒃᑲᓐᓂᕐᓗᒋᓪᓗ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᕿᒡᒋᓚᐅᙱᓐᓂᕐᓂ," ᑕᐃᒪᓐᓇ ᐅᖃᖅᖢᓂ. 

ᐊᓯᐊ ᐃᓕᓐᓂᐊᕐᕕᒃ ᐊᑐᓕᖁᔨᔪᖅ ᓯᓚᑦᑐᖅᓴᕐᕕᔾᔪᐊᖅ ᐃᐅᓪᐴᑕᒥᑦ, ᐃᓕᓐᓂᐊᕐᕕᒃ ᐅᑉᐱᕈᓱᑦᑐᖅ ᐃᑲᔪᖅᑐᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᖅᑎᓂᑦ ᑲᔪᓯᑎᑦᓯᓂᕐᒥᓪᓗ ᓄᓇᖃᖅᑳᖅᓯᒪᔪᓂᑦ ᐱᓕᕆᐊᑦᓴᓂᑦ. ᔅᑳᑦ-ᔫᓕᑰ ᖁᕕᐊᒋᔭᖃᖅᑐᖅ ᓯᓚᑦᑐᖅᓴᕐᕕᒻᒥᑦ ᐊᒻᒪᓗ ᓄᓇᓕᖓᑕ ᖃᓄᐃᑦᑑᓂᖓᓂᑦ ᑕᐃᑲᓂ. ᐊᕐᕌᒎᒃ ᒪᕐᕉᒃ ᐊᓂᒍᖅᓯᒪᓕᖅᑑᒃ ᓯᓚᑦᑐᖅᓴᕐᕕᖕᒥ ᕿᒥᕐᕈᓚᐅᖅᓯᒪᕗᖅ ᑲᑎᖃᑎᖃᖅᖢᓂᓗ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᕕᖏᓐᓂᒃ ᐱᐅᑦᑎᐊᓚᐅᖅᖢᓂᓗ.  

ᒪᑐᓕᕐᓗᒍ, ᓯᑳᑦ−ᔫᓕᑰᕐ ᐅᖃᐅᔾᔪᐃᒃᑲᓐᓂᖅᐳᖅ. "ᖃᓄᐃᓕᐅᖅᑕᐃᓕᒋᑦ ᓲᖃᐃᒻᒪ ᐊᓯᖕᓄᑦ ᐅᖃᐅᔾᔭᐅᖃᑦᑕᕋᕕᑦ ᑕᐃᒪᐃᑦᑕᕆᐊᖃᕐᓂᕐᓂᒃ. ᐃᓱᒪᕗᖓᓕ ᓇᒻᒥᓂᖅ ᐱᓕᕆᓐᓂᖏᒃᑯᒪ, ᓇᒻᒥᓂᖃᕋᔭᓚᐅᖏᑦᑐᖓ. ᐊᒥᓱᑲᓪᓚᐅᓚᐅᕐᒪᑕ ᐅᖃᐅᓯᐅᖃᑦᑕᓚᐅᖅᑐᑦ ᐃᓚᖏᑦ ᐃᓚᒌᑦ ᓇᒻᒥᓂᖁᑎᑖᖁᔨᓚᐅᙱᑦᑐᑦ ᐊᒻᒪᓗ ᓇᒻᒥᓂᖅ ᑕᑯᒍᓐᓇᓚᐅᙱᓐᓇᒪ ᒫᓐᓇᐅᔪᖅ. ᓲᖃᐃᒻᒪ ᐊᓯᖏᑦ ᐃᓄᐃᑦ ᓂᕆᐅᒋᔭᖃᕐᒪᑕ ᐃᓕᖕᓂᒃ ᐅᕝᕙᓘᓐᓃᑦ ᑎᓕᐅᕆᓪᓗᑎᒃ ᐃᓕᖕᓂᒃ ᖃᓄᐃᓕᐅᖁᓪᓗᑎᑦ, ᑕᐃᒪᐃᓕᐅᕈᒪᙱᒃᑯᕕᑦ, ᑕᐃᒪᐃᓕᐅᖅᑕᐃᓕᒋᑦ," ᐱᖁᔨᔪᖅ. 

ᓇᒻᒥᓂᖃᕐᓂᖅ ᐃᒪᐃᒍᒪᔪᖅ ᐊᒻᒪᓗ ᑕᐃᒪᐃᒻᒪᑦ ᐊᕕᑦᓯᓯᒪᑎᓪᓗᒍ ᐱᕕᖃᕐᓂᕆᓯᒪᔭᒥᓂᒃ ᐊᑯᕐᖓᓂ ᐊᓪᓚᖓᔫᑉ ᓄᓇᑖᖅᓯᒪᓂᖓᓄᑦ ᓴᐃᓐᑦ ᓗᐊᕋᓐᑦ, ᒫᓂᑑᕙ ᐊᒻᒪᓗ ᐅᐃᓂᐸᒡ, ᓴᐃᓐ ᓯᑳᑦ-ᔫᓕᑯᕐ ᑐᕌᒐᖃᖅᑐᖅ ᑲᔪᓯᑦᓯᐊᖅᑐᒥᒃ ᐊᓪᓚᖓᔪᓂᒃ ᓇᒻᒥᓂᖃᕐᓂᕐᒥᒃ. ᐃᓕᓐᓂᐊᕆᐊᖅᖢᓂ ᐊᒻᒪ ᐸᕐᓇᐃᓪᓗᓂ ᖃᓄᐃᓕᐅᖅᑐᓂᑦ, ᐊᖅᑯᑎᒃᑰᖅᐸᓪᓕᐊᕗᖅ ᐃᖅᑲᓇᐃᔮᕆᔪᒪᔭᒥᓄᑦ, ᐃᓕᖅᑯᓯᕐᒥᓂᒃ ᑐᙵᕕᖃᖅᖢᓂ ᐊᒻᒪ ᖃᐅᔨᒪᑦᑎᐊᖅᖢᓂ ᓇᒧᙵᐅᓂᐊᕐᒪᖔᑦ.  

‍

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

‍