"ᐱᓕᕆᐊᕆᔭᕋᓕ ᐃᓄᓕᕆᓂᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ... ᐊᑕᓕᖅᑎᑦᑎᓂᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ," ᐅᓂᒃᑲᐅᓯᖃᖅᐳᖅ ᓰᓚ ᐅᐊᑦ−ᑯᓘᑎᐅ ᐃᓅᓪᓗᓂ ᐃᓅᓪᓗᓂ ᓄᓇᕗᒻᒥᐅᑕᐅᓪᓗᓂ 18−ᓄᑦ ᐊᕐᕌᒍᓄᑦ ᓅᓚᐅᙱᓐᓂᕐᒥᓂ ᑰᔾᔪᐊᕐᒧᑦ, ᓄᓇᕕᒃᒧᑦ, ᑕᐃᑲᓂ ᐃᓅᕝᕕᒋᓚᐅᖅᑕᒥᓄᑦ. ᐱᓕᕆᓂᖅᓴᐅᖃᑦᑕᓚᐅᖅᐳᖅ ᑭᒃᑯᑐᐃᓐᓇᓂᒃ ᐱᓕᕆᑎᑦᑎᔪᓂᒃ ᓄᓇᕐᔪᐊᕐᒥ ᖃᓂᒻᒪᒍᑕᐅᔪᖅ ᓱᒃᑲᐃᒡᓕᕚᓪᓕᖅᑎᖦᖢᒍ ᐊᒻᒪ ᑐᓴᐅᒪᑎᑦᑎᔨᖏᑦ ᓅᖦᖢᒋᑦ. ᒪᓐᑐᕆᐋᓪᒧᑦ ᓅᒋᐊᖃᓚᐅᖅᑐᖅ ᖃᕋᓴᐅᔭᒃᑯᑦ ᑐᔪᐃᔾᔪᑎᐅᔪᖅ ᐱᐅᓂᖅᓴᐅᓪᓗᓂ, ᐋᖅᑭᒋᐊᖅᑕᐅᓚᐅᖅᑐᖅ, ᑭᓯᐊᓂᓕ ᒪᕐᕉᒃ ᕿᑐᕐᖓᖏᒃ ᐃᕐᖑᑕᖏᓪᓗ ᐃᓅᓪᓗᑎᒃ. 

ᓯᓚᑦᑐᓴᕐᕕᕐᔪᐊᕐᒥᑦ ᐃᓕᑕᕆᔭᐅᔾᔪᑎᖃᙱᒃᑲᓗᐊᖅᑐᓂ, ᓘᑦᑖᖃᖅᐳᖅ ᐃᓅᓯᖓᓄᑦ. ᑎᑎᕋᓚᐅᖅᑐᖅ ᐱᔪᓐᓇᐅᑎᖃᕐᓂᕐᒥᒃ ᐃᒃᑮᕐᓇᕐᓂᕐᒥᒃ, ᐃᖅᑲᐅᒪᔾᔪᑎᖓ ᐃᖏᕐᕋᓂᕆᓚᐅᖅᑕᖓᓄᑦ, ᒪᒃᑯᒃᑐᑦ ᑐᑭᓯᔪᓐᓇᕐᓂᐊᕐᒪᑕ ᑕᐃᔅᓱᒪᓂᓕᑕᕐᓂᒃ ᓄᓇᓕᖕᓂ ᐊᒃᓱᕉᑕᐅᔪᓂᒃ ᑐᑭᓯᓗᑎᒡᓗ ᖃᓄᖅ ᐊᒃᑐᐃᓲᖑᖕᒪᖔᑕ ᐊᓂᒍᐃᔪᓐᓇᕐᓂᕐᒥᒃ ᐊᒻᒪ ᐃᒻᒥᓂᒃ ᐱᓕᕆᔪᓐᓃᖅᑎᑦᑎᓂᕐᒥᒃ ᐃᓚᖏᓐᓂᒃ ᐊᖅᑯᓵᖅᐸᓪᓕᐊᔭᖏᓐᓂᒃ. 

"ᑕᒪᕐᒥᑦᑎᐊᖅ ᐃᓅᓯᐅᑉ ᐊᓯᔾᔨᖅᐸᓪᓕᐊᓂᖓ ᐃᓱᒪᒋᔭᕆᐊᖃᖅᑕᕗᑦ. ᑕᐃᑲᓃᑎᑕᐅᓇᓱᑐᐃᓐᓇᖅᐳᖅ ᐃᓕᖕᓂᒃ ᓱᕋᒃᓯᔪᒪᙱᖦᖢᓂ."

ᐃᓱᒪᒋᓪᓗᒍ ᑲᑎᒪᔨᐅᓂᕐᒧᑦ ᐃᖅᑲᓇᐃᔮᖓ, ᐅᖃᖅᑐᖅ, "ᒐᕙᒪᓕᕆᓂᕐᒧᑦ ᐃᓯᕈᒪᓚᐅᖅᓯᒪᙱᑦᑎᐊᖅᑐᖓ; ᐃᓱᒪᕋᑖᙱᓐᓇᒪ ᐃᓂᒋᒋᐊᖓᓂᒃ ᐅᕙᓐᓄᑦ. ᑭᓯᐊᓂᓕ, ᐅᕙᖓ ᓄᓇᖓᓐᓂ, ᐅᖃᐅᓯᖃᖅᑐᖓ ᐃᓅᓯᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒧᑦ ᐊᓯᑦᔨᕆᐊᕐᓂᕐᒧᑦ, ᐋᓐᓂᐊᖅᑐᓕᕆᓂᕐᒧᑦ ᐊᓯᑦᔨᕐᓂᕐᒧᑦ ᐅᕕᒃᑲᐅᓂᕐᓴᐅᑎᓪᓗᖓ ᐊᒻᒪᓗ ᐃᓅᓯᓕᒫᕋ ᐊᒻᒪᓗ ᑕᒪᓐᓇ ᐅᕙᓐᓄᑦ ᐃᒃᐱᒍᓱᓕᕈᑎᒋᓕᓚᐅᖅᑕᕋ, ᐃᒻᒪᖃ ᐃᓅᓯᓐᓂ, ᐅᕙᓐᓂᒃ ᑐᓂᓯᔪᒪᓪᓚᕆᓚᐅᖅᑐᖓ, ᓴᓐᖏᓂᖃᖅᑐᒥᒃ, ᑕᒫᖓᐅᖏᑦᑐᖅ, ᑭᓯᐊᓂ ᓄᓇ ᐃᑲᔪᕈᒪᑦᑎᐊᓚᐅᖅᑐᖅ ᓄᓇᑦᑎᓐᓂ."

ᐃᖅᑲᓇᐃᔭᓯᒋᐊᓚᐅᖅᑐᖅ ᐃᓕᓐᓂᐊᖅᑎᓄᑦ ᐃᓅᓯᓕᕆᔨᐅᓪᓗᓂ ᐊᒻᒪ ᑐᓵᔨᐅᓪᓗᓂ ᐋᓐᓂᐊᕕᖕᒥ ᐊᖏᕐᕋᒧᑦ ᐅᑎᓚᐅᖅᑎᓪᓗᒍ 18-ᖑᓚᐅᖅᖢᓂ ᐃᓕᓐᓂᐊᕆᐊᖅᓯᒪᔪᓐᓃᖅᖢᓂ ᐅᑭᐅᓄᑦ 8-ᓄᑦ, ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ, ᐃᓚᒥᓂᒃ ᑐᔪᕐᒥᓪᓗᓂ, ᐊᒻᒪ ᐃᓕᓐᓂᐊᕆᐊᖅᖢᓂ ᐋᑐᕚᒥ.  ᐃᖅᑲᓇᐃᔭᓚᐅᖅᓯᒪᒻᒥᔪᖅ ᐃᓕᓐᓂᐊᖅᑎᓄᑦ ᐃᑲᔪᖅᑎᐅᓪᓗᓂ ᒪᓐᑐᕆᐊᒥ, ᐊᒻᒪᓗ ᓘᑦᑖᕈᓚᐅᖅᓯᒪᒐᒥ, ᑭᓯᐊᓂᓕ ᖃᐅᔨᓚᐅᖅᑐᖅ ᖁᕕᐊᒋᔭᖃᓚᐅᖏᒻᒪᑦ ᑭᓪᓕᓯᓂᐊᕐᓂᕐᒥᒃ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᖃᐅᔨᓚᐅᖅᑐᖅ ᐊᑲᐅᙱᓕᐅᕈᑎᑦ ᓄᓇᓕᖏᑕ ᐃᒻᒪᑲᓪᓚᒃ ᐋᓐᓂᖅᓯᒪᓂᖏᓐᓄᑦ ᐊᒻᒪ ᐊᓯᔾᔨᖅᐸᓪᓕᐊᕌᓚᓴᕐᓂᖓᓄᑦ.

"ᐊᓈᓇᒪ ᑭᖑᓂᐊᒍᑦ, ᑐᓵᔨᐅᓚᐅᖅᓯᒪᔪᖅ ᐊᕐᕌᒍᒐᓴᖕᓄᑦ ᐱᔨᑦᑎᕋᑦᑎᐊᖃᑦᑕᖅᓯᒪᓪᓗᖓᓗ ᓄᓇᑦᑎᓐᓄᑦ, ᑕᐃᒪᓐᓇ ᐱᓕᕆᒃᑲᓐᓂᕈᓐᓇᖅᓯᓚᐅᖅᑐᖓ."

ᐃᖅᑲᓇᐃᔭᓚᐅᖅᓯᒪᔪᖅ ᐃᓕᓐᓂᐊᖅᑐᓕᕆᓂᕐᒥᑦ ᐊᕐᕌᒍᓄᑦ ᖁᓕᓄᑦ ᓂᕈᐊᕋᔅᓴᕈᓚᐅᕋᓂ. ᐱᓕᕆᖃᑎᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᕐᔪᐊᖏᓐᓂᑦ, ᓯᕗᓪᓕᖅᐹᒥ ᑲᓇᑕᒥ ᐊᕕᑦᑐᖅᓯᒪᔪᓂᑦ, ᐊᒻᒪᓗ ᓯᓚᕐᔪᐊᕐᒥ ᐃᒃᓯᕙᐅᑕᐅᓪᓗᓂ, 11-ᓂᑦ ᐊᕐᕌᒍᓂᑦ ᓴᐳᔾᔨᓚᐅᖅᑐᖅ ᐱᔪᓐᓇᐅᑎᐅᔪᓂᑦ ᐊᒻᒪᓗ ᐱᔪᒪᔭᐅᔪᓂᑦ ᐃᓄᓐᓄᑦ ᓯᓚᕐᔪᐊᒥᑦ. ᐅᖃᓪᓚᖕᓂᕐᒥᓄᑦ ᑎᑭᐅᑎᔪᓐᓇᖅᓯᕚᓪᓕᓚᐅᖅᑐᖅ, ᐅᖃᐅᓯᖅᑕᖏᑦ ᐃᓄᒋᐊᓄᑦ ᑎᑭᐅᑎᓪᓗᑎᒃ ᑕᐅᓴᖏᓐᓃᑦᑐᓂᒃ. 

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐃᓱᒪᑐᐃᓐᓇᕆᐊᓕᖕᓄᑦ ᕿᒪᐃᔪᒪᓂᕐᒥᒃ ᓄᓇᓕᖕᒥᓂᒃ ᐃᓕᓐᓂᐊᕆᐊᖅᑐᕐᓗᓂ, ᐃᖅᑲᓇᐃᔭᕆᐊᖅᑐᕐᓗᓂ ᓄᒃᑕᕐᓂᐊᕐᓗᓂᓘᓐᓃᑦ ᐱᔪᒥᓇᖅᐳᖅ. "ᓇᖕᒥᓂᖅ ᓴᓂᒧᑦ ᐊᖏᒡᓕᒋᐊᖅᑎᓪᓚᕆᒡᓗᒋᑦ... ᐃᓕᖕᓂᒃ ᐊᓯᐅᔨᕙᙱᓚᑎᑦ, ᑐᙵᕕᖃᑦᑎᐊᖅᐳᑎᑦ ᐃᓕᖅᑯᓯᕐᓂᒃ ᐅᖃᐅᓯᕐᓂᒡᓗ ᐃᓅᓯᕐᓂᓗ. ᑕᒪᓐᓇ ᕿᓂᒃᑲᓐᓂᕆᐊᖃᕈᕕᐅᒃ ᐱᐅᓯᕚᓪᓕᕈᑕᐅᑐᐃᓐᓇᖅᑐᒋᕙᕋ ᐊᒻᒪ ᓴᓐᖏᓕᖅᐹᓪᓕᕈᑕᐅᑐᐃᓐᓇᖅᑐᓂ ᑭᓇᐅᓂᕐᓄᑦ," ᐅᖃᖅᑐᓂ. 

ᐅᐊᑦ−ᑯᓘᑎᐊ ᑕᖃᐃᖅᓯᕈᒪᔪᖅ, ᐃᓱᒪᒋᔭᖃᖅᖢᓂ, ᐃᕐᖑᑕᒥᓂᒡᓗ ᐱᖃᑎᖃᖅᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᖏᓐᓇᖁᓪᓗᒍ. ᐊᖏᕐᕋᖅᓯᒪᑎᓪᓗᒍ ᐅᑭᐅᖅᑕᖅᑐᒥ ᖁᕕᐊᒋᕙᒃᐸᐅᒃ ᓯᑯᒥ ᐃᖃᓪᓕᐊᕐᓂᖅ, ᐃᖃᓪᓕᐊᕐᓂᖅ ᐊᐅᔭᒃᑯᑦ, ᐅᒥᐊᖅᑐᕐᓂᖅ ᐊᒻᒪ ᓄᓇᒦᓪᓗᓂ ᐸᐅᕐᖓᕐᓂᒃ ᐊᒻᒪ ᑲᔾᔮᕐᓇᖅᑐᒻᒪᕆᐊᓗᖕᓂᒃ ᖁᕕᐊᓱᒃᖢᓂ.

"ᐃᓕᖅᑯᓯᕋ ᐊᒃᑐᐊᓂᖃᕐᒪᑦ, ᓄᓇᖅᑲᑎᓐᓄᓪᓗ ᓴᙱᔪᒻᒪᕆᐊᓗᒃ ᐅᕙᓐᓄᑦ ᐱᔪᒃᓯᔾᔪᑎᒋᕙᕋᓗ ᑲᔪᓯᖁᔭᐅᓪᓗᖓ."

ᐱᔪᒃᓯᑎᑦᑎᓯᒪᔪᖅ ᑎᔅᓯᓈᕿᓪᓗᓂ ᐱᒋᐊᕐᖢᓂ, ᐱᕈᖅᓴᓪᓗᓂ ᒥᑭᑦᑐᑯᓗᖕᒥ ᓄᓇᓕᖕᒥ ᓴᙱᔪᒥᒃ ᐃᓅᖃᑎᒌᖕᓂᕐᒧᑦ ᐊᒃᑐᐊᓂᖃᕐᖢᓂ, ᐱᕈᖅᓴᓪᓗᓂ ᐊᓈᓇᒥᓄᑦ ᐊᓈᓇᑦᑎᐊᖓᓄᓪᓗ, ᐊᐃᑉᐸᖃᙱᑦᑐᑦ ᐊᓈᓇᐅᔪᑦ ᐃᖅᑲᓇᐃᔭᓚᐅᖅᑐᑦ ᓂᐅᕕᖅᑎᒃᑯᓐᓄᑦ ᐊᒻᒪ ᐱᔪᒪᓕᕐᓇᖅᑐᓄᑦ ᐅᖃᐅᓯᖅᑕᓄᑦ ᓗᓯ ᐹᓐ ᐊᒻᒪ ᒥᐊᕆᐋᓐ ᐅᐃᓕᐊᒻᓴᓐ. ᑎᑎᕋᖅᐸᓪᓕᐊᓕᖅᑐᖅ ᐊᐃᑉᐸᖓᓂ ᐅᖃᓕᒫᒐᕐᒥᑦ ᐆᒻᒪᑎᒧᑦ ᑐᕌᖓᓪᓗᐊᑕᖅᑐᒥᑦ ᓯᕗᓕᖅᑎᐅᓂᕐᒥᑦ ᐊᒻᒪ ᐃᓱᒪᒋᔭᖓᓂᑦ ᐊᓯᔾᔩᓂᕐᒥᑦ ᑐᙵᕕᖃᖅᑐᖅ ᐊᐃᑉᐸᕇᓐᓂᕐᒥᑦ. "ᐊᒃᓱᕈᕐᓇᖅᑐᖅ ᐃᓕᖕᓂᒃ ᐊᐅᓚᔾᔭᒃᑎᑦᑎᔪᓐᓇᑦᑎᐊᖅᑐᖅ ᖃᓄᐃᓕᐅᕆᐊᒃᓴᖅ, ᑭᓯᐊᓂ ᑕᐃᒪᓐᓇ ᑕᑯᒃᓴᐅᑎᑦᑎᓂᖅᓴᐅᓗᓂ ᐃᓄᖕᓂᒃ ᑲᑎᑎᑦᑎᓂᕐᒥᒃ, ᑐᑭᓯᐅᒪᑦᑎᐊᕐᓂᖅᓴᐅᓂᕐᒥᒃ, ᑕᒪᒃᑯᐊ ᐊᑯᓂᐅᓐᓇᕐᒪᑕ. ᐅᖃᕋᔪᒃᑭᕗᖓᑦᑕᐅᖅ ᑕᒪᒃᑯᐊ ᓇᓪᓕᒍᓱᓐᓂᐅᔪᑦ ᓱᒃᑲᓕᔪᒃᑯᑦ ᓴᖅᑭᖃᑦᑕᕐᓂᐊᕐᖓᑕ... ᐊᒻᒪᓗ ᑕᐃᒪᐃᓛᖅᖢᑎᒃ ᐅᒃᐱᕈᓱᖕᓂᖃᑦᑎᐊᓕᖅᐸᑕ," ᑐᓴᖅᑎᑦᑎᕗᖅ. 

ᑭᖑᒧᑦ ᑕᑯᓪᓗᓂ, ᒪᒃᑯᖕᓂᖅᓴᖅ ᐅᖃᐅᑎᔪᒪᖕᒪᒍ, "ᖃᐅᔨᒪᔪᖓ ᐊᑦᑕᕐᓇᖃᑦᑕᖅᓯᒪᓂᖏᓐᓂᒃ ᑭᖑᓂᑦᑎᓐᓂ, ᑭᓯᐊᓂ ᐊᑦᑕᕐᓇᙱᑦᑐᒦᓕᖅᐳᑎᑦ ᒫᓐᓇ....ᐊᒃᓱᕈᖅᖢᑎᑦ ᐱᓕᕆᓯᒪᒐᕕᑦ ᐱᓇᔪᓪᓚᕆᒃᖢᑎᒃ ᐊᒻᒪ ᐱᓕᕆᓪᓚᕆᒍᒪᓪᓗᑎᑦ... ᖁᔭᓐᓇᒦᒃ ᐅᒃᐱᕈᓱᒃᑲᕕᑦ ᑕᒪᑐᒥᖓ, ᐅᒃᐱᕈᓱᖕᓂᕐᓄᑦ ᖃᓄᐃᔾᔮᙱᓐᓂᕐᓂᒃ." ᐃᒻᒥᓂᒃᑕᐅᖅ ᐅᖃᕈᓐᓇᖁᔨᒋᕗᖅ, "ᓂᕆᐅᒋᔭᖃᕈᓐᓃᖅᑕᐃᓕᒋᑦ. ᓱᕋᒐᐃᒐᕕᑦ, ᓱᕋᔅᓴᕋᐃᑦᑑᒐᔪᒻᒪᑦ ᑎᕆᖅᑯᐊᓂ. ᑕᒪᓐᓇ ᓇᐃᓈᖅᑕᐃᓕᒍᒃ ᐃᓱᒪᓗᑎᑦ ᐃᓅᓯᕐᓂᒃ ᐅᕝᕙᓘᓐᓃᑦ ᓇᖕᒥᓂᖅ ᓱᕋᐃᓂᕐᒥᒃ ᐋᖓᔮᕐᓇᖅᑐᓄᑦ ᐃᒥᐊᓗᖕᒧᓪᓘᓐᓃᑦ, ᓲᖃᐃᒻᒪ ᐊᑐᖅᑕᑎᑦ ᐊᑐᒐᔪᒃᑕᖓᒍᑦ ᑕᐃᔭᐅᓪᓗᓂ ᐊᓯᔾᔨᖅᐸᓪᓕᐊᓂᖅ ᑕᕐᓂᒃᑯᑦ... ᐱᔾᔪᑎᑕᖃᕐᒪᑦ ᑕᐃᒪᐃᑦᑐᓂᒃ ᐊᒃᓱᕈᕐᓇᖅᑐᓂᒃ ᑕᐃᒪᐃᒻᒪᑦ ᐱᒻᒪᕆᐅᕗᖅ ᓴᐱᓕᖅᑕᐃᓕᓗᓂ....ᑕᐃᒪᓐᓇ ᑖᖅᑐᐊᓘᒃᐸᑦ ᒫᓐᓇ, ᑕᐅᕗᖓᓕᒫᖅ ᑐᕌᖓᔾᔮᙱᑦᑐᖅ." 

ᐱᕈᖅᐸᓪᓕᐊᑎᓪᓗᒍ ᐊᓐᓇᒍᓐᓇᕐᓂᖅ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᐅᑐᒃᓗᑎᒃ ᖁᑦᑎᓛᒥᒃ ᐃᖕᒥᓃᕐᓂᕐᒧᑦ ᖃᔅᓯᐅᓂᖏᓐᓂ ᐅᐊᖕᓇᖓᓂ ᐊᒥᐊᓕᒐᑦ, ᑕᑯᔪᖅ ᐱᑕᖃᖅᑐᓂᒃ ᓂᕆᐅᖕᓂᖃᕐᓂᕐᒧᑦ ᐃᓕᖅᑯᓯᕐᓂ. "ᐱᖅᑯᓯᑐᖃᒃᑯᑦ ᐊᔪᕈᓐᓃᖅᑕᐅᕙᒃᑐᑦ ᐃᓕᖅᑯᓯᑦᑎᐊᕙᐅᕗᑦ, ᐊᐅᓪᓛᖅᓯᒪᑎᓪᓗᑎᑦ, ᐊᖑᓇᓱᒋᐊᖅᓯᒪᑎᓪᓗᑎᑦ ᐊᒻᒪ ᐃᖃᓪᓕᐊᖅᓯᒪᑎᓪᓗᑎᑦ ᐊᒻᒪ ᐱᖅᑯᓯᖃᖅᖢᑎᑦ, ᑕᒪᒃᑯᐊ ᓴᙱᔫᕗᑦ ᐃᓕᑎᑦᑎᓪᓗᑎᒃ ᑭᓇᐅᓂᕐᓂᑦ, ᓅᑕᐅᔪᓐᓇᖅᓯᓪᓗᑎᒃ ᒫᓐᓇᐅᔪᒧᑦ ᓄᓇᕐᔪᐊᕐᒧᑦ. ᐃᓕᓐᓂᐊᖅᑎᑕᐅᕗᑎᑦ ᓯᑯᒥ ᐅᕝᕙᓘᓐᓃᑦ ᓄᓇᒥ... ᐊᒃᓱᕈᖅᑎᑕᐅᓂᖅ, ᖃᓄᖅ ᐊᒃᓱᕈᕐᓇᖅᑐᒃᑰᕈᓐᓇᕐᓂᕐᒥᑦ, ᖃᓄᖅ ᐃᓱᒪᖕᓇᙱᑎᑦᑎᔪᓐᓇᕐᒪᖔᑦ, ᑕᒪᒃᑯᐊᓕᒫᑦ... ᐃᖅᑲᖅᑐᐃᑦᑎᐊᓕᕐᓇᖅᐳᖅ ᓯᓚᑐᔫᓕᕐᓇᖅᖢᓂᓗ," ᐅᖃᖅᖢᓂ. ᑕᐃᒪᐃᒻᒪᑦ ᐊᔭᐅᖅᑐᐃᖃᑦᑕᖅᐳᖅ ᓄᓇᒥᒃ ᐃᓕᓐᓂᐊᖅᑎᑦᑎᓂᕐᒥᒃ ᐊᒻᒪ ᒪᒥᓴᕐᓂᕐᒥᒃ ᐃᓕᓐᓂᐊᖅᑎᑦᑎᕙᒃᑐᓂᒃ ᐱᐅᖅᓱᐊᕐᓂᑐᐃᓐᓇᐅᖏᑦᑐᓂᒃ ᐊᒻᒪ ᐊᖑᓇᓱᖕᓂᕐᒨᖓᔪᓂᒃ, ᑭᓯᐊᓂᑦᑕᐅᖅ ᓇᖕᒥᓂᖅ ᐱᕙᓪᓕᐊᓂᐅᔪᓂᒃ. 

ᐱᓕᕆᓂᖓ ᐃᓄᓕᕆᓂᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᐊᒻᒪ ᐃᓄᐃᑦ ᐱᓕᕆᓂᕆᔭᖓᑦ ᐊᒃᑐᐊᓂᖃᖁᓪᓗᒍ ᐊᒻᒪ ᓄᓇᖅᑲᑎᒌᓄᑦ, ᓰᓚ ᐅᐊᑦ−ᑯᓘᑎᐊᐃ ᐅᖅᑰᔪᒥᒃ ᑐᓴᖅᑎᑦᑎᕗᖅ ᐅᑭᐅᖅᑕᖅᑐᒥ ᓂᒡᓚᓱᒃᑐᒥᑦ ᓴᐳᔾᔨᓪᓗᓂ. ᑎᔅᓯᓈᕿᓪᓗᓂ ᐱᒋᐊᕐᓂᖓᓄᑦ, ᓴᖅᑭᑦᑎᓇᓱᖕᒪᑦ ᓯᕗᓂᒃᓴᑦᑎᐊᕙᖕᒥᑦ ᒪᒃᑯᒃᑐᓄᑦ, ᐃᑲᔪᕋᓱᒃᖢᓂᔾᔪᒃ ᑭᓱᒥᑦ ᓂᕆᐅᖕᓂᖃᕆᐊᒃᓴᖅ ᖃᐅᒃᐸᒧᑦ, ᑐᙵᕕᖃᖅᖢᓂ ᓱᓕᔪᒥᑦ, ᓯᓚᑐᓂᖕᒥᑦ ᐱᐅᓯᖕᒥᓪᓗ ᑭᖑᓂᑦᑎᓐᓂᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.